Маҷлиси миллӣ ҷазо барои пахши "ахбори ғалат"-ро қабул кард. Талаби ҷомеаи шаҳрвандӣ рад шуд

Маҷлиси миллӣ, палатаи болоии порлумони Тоҷикистон тағйироти баҳсбарангез ба Кодекси ҳуқуқвайронкунии маъмуриро тасвиб кард, ки бар асоси он барои пахши "ахбори ғалат" дар бораи коронавирус ҷарима муқаррар шудааст. Ҷомеаи шаҳрвандии Тоҷикистон чанд рӯз қабл аз аъзоёни Маҷлиси миллӣ талаб карданд, то аз тасвиби тарҳ худдорӣ кунад.

Тағйироти баҳсбарангез ба Кодекси ҳуқуқвайронкунии маъмурӣ рӯзи 26-уми июн дар ҷаласаи дуюми Маҷлиси миллӣ қабул шуд.

Ёдгор Файзов, раиси Вилояти Мухтори Куҳистони Бадахшон ва муовини раиси Маҷлиси миллӣ ба Радиои Озодӣ гуфт, тағйирот ба Кодекси ҳуқуқвайронкунии маъмурӣ тасвиб шуд. Файзов дар посух ба суоли онки чаро назари ҷомеаи шаҳрвандӣ ба инобат гирифта нашуд, афзуд, дар ҷаласа "дар ин бора ягон дархост пешниҳод нашуд".

Дафтари матбуотии Маҷлиси миллӣ гуфт, ҷаласаи Маҷлиси миллӣ тамом шуда, иттилоия дертар нашр мешавад. Ҷаласаи дуввуми Маҷлиси миллӣ даъвати шашум зери роҳбари Рустами Эмомалӣ, раиси шаҳри Душанбе ва писари президент доир гардид ва рӯзноманигрони мустақилро ба фарқ аз ҷаласаҳои даъвати гузашта ба толор роҳ надоданд. Мақомот гуфтанд, ба хотири пешгирӣ аз пандемияи коронавирус, наметавонанд ҳама рӯзноманигорон ба толор роҳ диҳанд.

Маҷлиси миллӣ дар ҳоле ҷазо барои пахши ахбори ба гуфтаи мақомот, ғалатро тасвиб мекунад, ки се рӯз қабл ҷомеаи шаҳрвандӣ аз аъзоёни палатаи болоии порлумон хостанд аз қабули ин тағйирот худдорӣ кунанд. Ба қавли намояндагони ҷомеаи шаҳрвандӣ, чунин муқаррарот баҳонае барои таъқиби фаъолон ва рӯзноманигорони мустақил мегардад.

Мунтақидон онро "зарбае ба озодии баён" медонанд, вале мақомот мегӯянд, "ҳадаф пешгирӣ аз пахши ахбори носаҳеҳ аст".

Ҷазо барои пахши "ахбори ғалат" баъди тасвиб аз сӯи ҳарду палатаи порлумон, акнун танҳо баъди имзои раиси ҷумҳур ва нашри он дар расонаҳои давлатӣ, ба иҷро медарояд.